waqt ka intiKHab hain hum log

vaqt kā intiḳhāb haiñ ham log

kitne izzat-ma.āb haiñ ham log

hādse ham pe naaz karte haiñ

har balā kā javāb haiñ ham log

ham se miltī hai raushnī sab ko

vaqt kā āftāb haiñ ham log

ham ne tūfāñ ke ruḳh bhī moḌe haiñ

dekhne meñ habāb haiñ ham log

ham ne likkhā hai pyaar kā dastūr

āshtī kī kitāb haiñ ham log

ḳhud ko patthar banā liyā ham ne

tere dil kā javāb haiñ ham log

tū hamāre diloñ kī dhaḌkan hai

terī āñkhoñ kā ḳhvāb haiñ ham log

chashm-e-yārāñ meñ ḳhaar haiñ lekin

dar-haqīqat gulāb haiñ ham log

ham ko duniyā 'nazīr' kuchh bhī kahe

aap apnā javāb haiñ ham log

waqt ka intiKHab hain hum log

kitne izzat-maab hain hum log

hadse hum pe naz karte hain

har bala ka jawab hain hum log

hum se milti hai raushni sab ko

waqt ka aaftab hain hum log

hum ne tufan ke ruKH bhi moDe hain

dekhne mein habab hain hum log

hum ne likkha hai pyar ka dastur

aashti ki kitab hain hum log

KHud ko patthar bana liya hum ne

tere dil ka jawab hain hum log

tu hamare dilon ki dhaDkan hai

teri aankhon ka KHwab hain hum log

chashm-e-yaran mein KHar hain lekin

dar-haqiqat gulab hain hum log

hum ko duniya 'nazir' kuchh bhi kahe

aap apna jawab hain hum log