waqt kaisa aa gaya wo bhi hai qatil ki taraf

vaqt kaisā aa gayā vo bhī hai qātil kī taraf

jis ko honā chāhiye thā apne bismil kī taraf

koī sāthī hai na rahbar zindagī kī raah meñ

kab se tanhā chal rahā huuñ apnī manzil kī taraf

jis jagah taz.hīk hotī hai kisī insān kī

maiñ to jaatā hī nahīñ huuñ aisī mahfil kī taraf

mere dil ko bhā gayā hai terā rū-e-be-misāl

ab nahīñ maiñ dekhtā huuñ māh-e-kāmil kī taraf

ġham ke dariyā meñ kabhī jab Dūbne lagtā huuñ maiñ

khīñch laatī hai tumhārī yaad sāhil kī taraf

hausla rakhtā nahīñ jo us kā hāfiz hai ḳhudā

mujh se dekhā hī nahīñ jaatā hai buzdil kī taraf

jis jagah milne kā vā'da thā mire vā'da-shikan

maiñ chalā jaatā huuñ tanhā ab bhī sāhil kī taraf

maiñ jiye jaatā huuñ 'manzar' haq kī ḳhātir aaj bhī

haath phir kaise baḌhā duuñ apnā bātil kī taraf

waqt kaisa aa gaya wo bhi hai qatil ki taraf

jis ko hona chahiye tha apne bismil ki taraf

koi sathi hai na rahbar zindagi ki rah mein

kab se tanha chal raha hun apni manzil ki taraf

jis jagah tazhik hoti hai kisi insan ki

main to jata hi nahin hun aisi mahfil ki taraf

mere dil ko bha gaya hai tera ru-e-be-misal

ab nahin main dekhta hun mah-e-kaamil ki taraf

gham ke dariya mein kabhi jab Dubne lagta hun main

khinch lati hai tumhaari yaad sahil ki taraf

hausla rakhta nahin jo us ka hafiz hai KHuda

mujh se dekha hi nahin jata hai buzdil ki taraf

jis jagah milne ka wa'da tha mere wa'da-shikan

main chala jata hun tanha ab bhi sahil ki taraf

main jiye jata hun 'manzar' haq ki KHatir aaj bhi

hath phir kaise baDha dun apna baatil ki taraf