waqt ke par qainchiyan le kar katar sakta hai kaun

vaqt ke par qaiñchiyāñ le kar katar saktā hai kaun

is parinde ko qafas meñ qaid kar saktā hai kaun

titliyāñ kaliyāñ ye gul-būTe ye husn-e-kā.enāt

juz ḳhudā tasvīr meñ ye rang bhar saktā hai kaun

bhuuk kī shiddat kā hai maanā shikam-serī 'ilāj

nāqa-e-hirs-o-havas kā peT bhar saktā hai kaun

'aks DhūñDe kaun tā'bīroñ ke chashm-e-ḳhvāb meñ

in kaTīlī shāh-rāhoñ se guzar saktā hai kaun

ho bachānā jab use dariyā meñ kar de rāste

vo Dubone par agar aa.e ubhar saktā hai kaun

sang-dil ko narm-o-nāzuk phuul kar to luuñ magar

terī ḳhushbū kī tarah mujh meñ utar saktā hai kaun

kis kī himmat hai amīr-e-vaqt se āñkheñ milā.e

chaḌhte sūraj se nigāheñ chaar kar saktā hai kaun

jis kī chhat par shaam tak baiThī rahe saffāk dhuup

mom kā us ghar meñ kārobār kar saktā hai kaun

ḳhvāhishoñ kī fasl bo denā bahut āsāñ 'sharar'

'umr bhar lekin ise sairāb kar saktā hai kaun

waqt ke par qainchiyan le kar katar sakta hai kaun

is parinde ko qafas mein qaid kar sakta hai kaun

titliyan kaliyan ye gul-buTe ye husn-e-kaenat

juz KHuda taswir mein ye rang bhar sakta hai kaun

bhuk ki shiddat ka hai mana shikam-seri 'ilaj

naqa-e-hirs-o-hawas ka peT bhar sakta hai kaun

'aks DhunDe kaun ta'biron ke chashm-e-KHwab mein

in kaTili shah-rahon se guzar sakta hai kaun

ho bachana jab use dariya mein kar de raste

wo Dubone par agar aae ubhar sakta hai kaun

sang-dil ko narm-o-nazuk phul kar to lun magar

teri KHushbu ki tarah mujh mein utar sakta hai kaun

kis ki himmat hai amir-e-waqt se aankhen milae

chaDhte suraj se nigahen chaar kar sakta hai kaun

jis ki chhat par sham tak baiThi rahe saffak dhup

mom ka us ghar mein karobar kar sakta hai kaun

KHwahishon ki fasl bo dena bahut aasan 'sharar'

'umr bhar lekin ise sairab kar sakta hai kaun