waqt ke taqazon ko is tarah bhi samjha kar

vaqt ke taqāzoñ ko is tarah bhī samjhā kar

aaj kī gavāhī par mat qayās-e-fardā kar

tere har ravayye meñ bad-gumāniyāñ kaisī

jab talak hai duniyā meñ e'tibār-e-duniyā kar

jis ne zindagī dī hai vo bhī sochtā hogā

zindagī ke baare meñ is qadar na sochā kar

harf o lab se hotā hai kab adā har ik mafhūm

be-zabān āñkhoñ kī guftugū bhī samjhā kar

ek din yahī aadat tujh ko ḳhuuñ rulā.egī

tū jo yuuñ parakhtā hai har kisī ko apnā kar

ye badaltī qadreñ hī hāsil-e-zamāna haiñ

baar baar maazī ke yuuñ varaq na ulTā kar

ḳhuuñ rulā.enge manzar mat qarīb aa 'mohsin'

ā.īna-kada hai dahr duur se tamāshā kar

waqt ke taqazon ko is tarah bhi samjha kar

aaj ki gawahi par mat qayas-e-farda kar

tere har rawayye mein bad-gumaniyan kaisi

jab talak hai duniya mein e'tibar-e-duniya kar

jis ne zindagi di hai wo bhi sochta hoga

zindagi ke bare mein is qadar na socha kar

harf o lab se hota hai kab ada har ek mafhum

be-zaban aankhon ki guftugu bhi samjha kar

ek din yahi aadat tujh ko KHun rulaegi

tu jo yun parakhta hai har kisi ko apna kar

ye badalti qadren hi hasil-e-zamana hain

bar bar mazi ke yun waraq na ulTa kar

KHun rulaenge manzar mat qarib aa 'mohsin'

aaina-kada hai dahr dur se tamasha kar