waqt ki wusat mein raushan har nishan suraj ka hai

vaqt kī vus.at meñ raushan har nishāñ sūraj kā hai

har zamīñ sūraj kī hai har āsmāñ sūraj kā hai

us ke harf-o-lafz meñ poshīda hai rāz-e-hayāt

tā-qayāmat rahne vaalā armuġhān sūraj kā hai

zindagī kī har kahānī hai ujāloñ se juḌī

kahkashāñ ātish-fishāñ aur shā.egāñ sūraj kā hai

in sulagte parbatoñ meñ dekhiye us ke nuqūsh

haiñ sharāre bhī usī ke aur dhuāñ sūraj kā hai

haiñ usī ke rang bikhre āsmāñ-dar-āsmāñ

aur zamīñ kī god meñ ganj-e-ravāñ sūraj kā hai

vo miTā de yā karā de paar sahrā ke 'mirāq'

maiñ to huuñ mahv-e-safar ab imtihāñ sūraj kā hai

waqt ki wusat mein raushan har nishan suraj ka hai

har zamin suraj ki hai har aasman suraj ka hai

us ke harf-o-lafz mein poshida hai raaz-e-hayat

ta-qayamat rahne wala armughan suraj ka hai

zindagi ki har kahani hai ujalon se juDi

kahkashan aatish-fishan aur shaegan suraj ka hai

in sulagte parbaton mein dekhiye us ke nuqush

hain sharare bhi usi ke aur dhuan suraj ka hai

hain usi ke rang bikhre aasman-dar-asman

aur zamin ki god mein ganj-e-rawan suraj ka hai

wo miTa de ya kara de par sahra ke 'miraq'

main to hun mahw-e-safar ab imtihan suraj ka hai