waqt ne har-waqt hi zer-o-zabar jari rakha

vaqt ne har-vaqt hī zer-o-zabar jaarī rakhā

ham ne bhī har haal meñ apnā safar jaarī rakhā

mujh ko kaTh-putlī banā kar raqs karvātī rahī

zindagī ne ye tamāsha umr bhar jaarī rakhā

uñgliyoñ se aa rahī hai aaj bhī ḳhushbū tirī

jādūī sī is chhuvan ne hai asar jaarī rakhā

jaane kitne pattharoñ se choT kī ham ne magar

peḌ ne phir bhī hameñ denā samar jaarī rakhā

mushkiloñ ke daur meñ bhī hausla chhoḌā nahīñ

aable talvoñ meñ the phir bhī safar jaarī rakhā

yuuñ to āvāra-mizājī meñ kabhī ham kam na the

phir bhī ham ne lauT aanā apne ghar jaarī rakhā

kaise kahte haiñ mukammal sher yā umda ġhazal

sīkhnā 'agyāt' ne ilm-o-hunar jaarī rakhā

waqt ne har-waqt hi zer-o-zabar jari rakha

hum ne bhi har haal mein apna safar jari rakha

mujh ko kaTh-putli bana kar raqs karwati rahi

zindagi ne ye tamasha umr bhar jari rakha

ungliyon se aa rahi hai aaj bhi KHushbu teri

jadui si is chhuwan ne hai asar jari rakha

jaane kitne pattharon se choT ki hum ne magar

peD ne phir bhi hamein dena samar jari rakha

mushkilon ke daur mein bhi hausla chhoDa nahin

aable talwon mein the phir bhi safar jari rakha

yun to aawara-mizaji mein kabhi hum kam na the

phir bhi hum ne lauT aana apne ghar jari rakha

kaise kahte hain mukammal sher ya umda ghazal

sikhna 'agyat' ne ilm-o-hunar jari rakha