waqt ne luTe hain hasti ke KHazane kitne

vaqt ne luuTe haiñ hastī ke ḳhazāne kitne

ḳhaak kā Dher hue qasr na-jāne kitne

ḳhvāb ehsās nazar yaad tasavvur dhaḌkan

maiñ ne tere liye rakkhe haiñ Thikāne kitne

aaj manzil pe pahuñch kar mujhe ehsās huā

raah meñ chhūT ga.e dost purāne kitne

dil vo panchhī hai kabhī daam meñ aatā hī nahīñ

chuuk jaate haiñ nigāhoñ ke nishāne kitne

jab bhī ta.abīr kī āñkhoñ se milā.īñ āñkheñ

ruuh ko chhed ga.e ḳhvāb suhāne kitne

dāman-e-sabr na chhoḌeñge kabhī ahl-e-vafā

tum banāoge mirī jaan bahāne kitne

kyā batā.ūñ maiñ rah-e-sher-o-suḳhan meñ ai 'atīb'

naqsh chhoḌe haiñ mirī fikr-e-rasā ne kitne

waqt ne luTe hain hasti ke KHazane kitne

KHak ka Dher hue qasr na-jaane kitne

KHwab ehsas nazar yaad tasawwur dhaDkan

main ne tere liye rakkhe hain Thikane kitne

aaj manzil pe pahunch kar mujhe ehsas hua

rah mein chhuT gae dost purane kitne

dil wo panchhi hai kabhi dam mein aata hi nahin

chuk jate hain nigahon ke nishane kitne

jab bhi tabir ki aankhon se milain aankhen

ruh ko chhed gae KHwab suhane kitne

daman-e-sabr na chhoDenge kabhi ahl-e-wafa

tum banaoge meri jaan bahane kitne

kya bataun main rah-e-sher-o-suKHan mein ai 'atib'

naqsh chhoDe hain meri fikr-e-rasa ne kitne