viraniyon ke Khaar to phulon ki chhuwan bhi

vīrāniyoñ ke ḳhaar to phūloñ kī chhuvan bhī

is raah meñ aa.e haiñ bayābāñ bhī chaman bhī

khulnā thā faqat ek darīcha mire ghar kā

phir raushnī bhī aa.ii, huī duur ghuTan bhī

bachche ne sajā.ī hai koī aur hī duniyā

khīñchā hai jahāñ baagh vahīñ rakkhā hai hiran bhī

yaad apne vatan kī mujhe aatī nahīñ ab to

ab bhuul chukā hogā mujhe merā vatan bhī

hassās banā Daalā mujhe had se ziyāda

aur is pe mohabbat ne diyā sher kā fan bhī

kis khoj meñ the shahr ke sab log na jaane

chehroñ pe udāsī bhī hai āñkhoñ meñ thakan bhī

āsān nahīñ hai ye safar ruuh kā 'saurabh'

haa.il hai tirī raah meñ ik dasht-e-badan bhī

viraniyon ke KHar to phulon ki chhuwan bhi

is rah mein aae hain bayaban bhi chaman bhi

khulna tha faqat ek daricha mere ghar ka

phir raushni bhi aai, hui dur ghuTan bhi

bachche ne sajai hai koi aur hi duniya

khincha hai jahan bagh wahin rakkha hai hiran bhi

yaad apne watan ki mujhe aati nahin ab to

ab bhul chuka hoga mujhe mera watan bhi

hassas bana Dala mujhe had se ziyaada

aur is pe mohabbat ne diya sher ka fan bhi

kis khoj mein the shahr ke sab log na jaane

chehron pe udasi bhi hai aankhon mein thakan bhi

aasan nahin hai ye safar ruh ka 'saurabh'

hail hai teri rah mein ek dasht-e-badan bhi