main apne aap se kalam kar raha tha

maiñ apne aap se kalām kar rahā thā

chaḌhā huā thā jo nasha utar rahā thā

tamām kā.enāt ek nuqte meñ thī

maiñ vajd meñ thā aur raqs kar rahā thā

qadīm āsmān hañs rahā thā mujh pe

na.ī zamīn par maiñ paañv dhar rahā thā

'ajīb sī uthal-puthal machī thī mujh meñ

daraḳht sabze ko vidā' kar rahā thā

darūn-e-zāt raushnī simaT rahī thī

darūn-e-zāt ek zaḳhm bhar rahā thā

shikasta naav hairatoñ se bhar ga.ī thī

bhañvar ke darmiyāñ bhañvar ubhar rahā thā

tamām marhale mire liye na.e the

maiñ pahlī baar aag se guzar rahā thā

main apne aap se kalam kar raha tha

chaDha hua tha jo nasha utar raha tha

tamam kaenat ek nuqte mein thi

main wajd mein tha aur raqs kar raha tha

qadim aasman hans raha tha mujh pe

nai zamin par main panw dhar raha tha

'ajib si uthal-puthal machi thi mujh mein

daraKHt sabze ko wida' kar raha tha

darun-e-zat raushni simaT rahi thi

darun-e-zat ek zaKHm bhar raha tha

shikasta naw hairaton se bhar gai thi

bhanwar ke darmiyan bhanwar ubhar raha tha

tamam marhale mere liye nae the

main pahli bar aag se guzar raha tha