hum na dhyani the na irfani the

ham na dhyānī the na 'irfānī the

ham suḳhan-sāz to imkānī the

us kī qir.at se hue haiñ āzād

ham jo ik lafz ke zindānī the

ḳhaak se baa'd meñ mansūb hue

avval-e-avval to sabhī paanī the

ham jise oḌhe hue rahte the

ḳhvāb usī niiñd kī 'uryānī the

ab jo ābād nazar aatā hai

ham usī dasht kī vīrānī the

ham kisī aur kī mushkil haiñ ab

ham kisī aur kī āsānī the

sabz rahtā thā vo har mausam meñ

us kī āñkhoñ meñ ka.ī paanī the

us kā idrāk badan bhar hī thā

aur mire mas.ale rūhānī the

hum na dhyani the na 'irfani the

hum suKHan-saz to imkani the

us ki qirat se hue hain aazad

hum jo ek lafz ke zindani the

KHak se ba'd mein mansub hue

awwal-e-awwal to sabhi pani the

hum jise oDhe hue rahte the

KHwab usi nind ki 'uryani the

ab jo aabaad nazar aata hai

hum usi dasht ki virani the

hum kisi aur ki mushkil hain ab

hum kisi aur ki aasani the

sabz rahta tha wo har mausam mein

us ki aankhon mein kai pani the

us ka idrak badan bhar hi tha

aur mere masale ruhani the