wo aadmi jo dard ka hamil nahin raha

vo aadmī jo dard kā hāmil nahīñ rahā

kaif-e-ġham-e-hayāt use hāsil nahīñ rahā

pahlā sā ab vo rang-e-mahāfil nahīñ rahā

us shoḳh kā koī mutabādil nahīñ rahā

ai mauj-e-‘azm-sāz talātum meñ le ke chal

ab e'tibār-e-ġhairat-e-sāhil nahīñ rahā

mahrūm-e-zarf ho ga.e shāyad junūñ-mizāj

zindāñ meñ kyoñ vo shor-e-salāsil nahīñ rahā

ai rabb-e-kā.ināt hameñ paak ḳhuun de

mīzān-e-dahr meñ koī 'ādil nahīñ rahā

mahkā rahā maiñ nik.hat-e-jānāñ meñ har nafas

chūñki ḳhayāl-e-zulf se ġhāfil nahīñ rahā

ai dast-e-zulm tū ne ye sochā bhī hai kabhī

kyā hogā tū jo zulm ke qābil nahīñ rahā

wo aadmi jo dard ka hamil nahin raha

kaif-e-gham-e-hayat use hasil nahin raha

pahla sa ab wo rang-e-mahafil nahin raha

us shoKH ka koi mutabaadil nahin raha

ai mauj-e-‘azm-saz talatum mein le ke chal

ab e'tibar-e-ghairat-e-sahil nahin raha

mahrum-e-zarf ho gae shayad junun-mizaj

zindan mein kyon wo shor-e-salasil nahin raha

ai rabb-e-kainat hamein pak KHun de

mizan-e-dahr mein koi 'adil nahin raha

mahka raha main nikhat-e-jaanan mein har nafas

chunki KHayal-e-zulf se ghafil nahin raha

ai dast-e-zulm tu ne ye socha bhi hai kabhi

kya hoga tu jo zulm ke qabil nahin raha