wo aadmi mujhe pariyon ki dastan ka laga

vo aadmī mujhe pariyoñ kī dāstāñ kā lagā

hasīñ thā itnā kisī aur hī jahāñ kā lagā

vo ḳhadd-o-ḳhāl the pūrab ke yā ki pachchhim ke

jab us ko ġhaur se dekhā kahāñ kahāñ kā lagā

hazār vasvase lāhaq the jis ke milne par

jab us ke dil ko TaTolā to mehrbāñ kā lagā

milā jab us se to thā itnī bad-havāsī meñ

ġhazal meñ qāfiya mujh se yahāñ-vahāñ kā lagā

fasurda shaam thī so us ke ghar basar kar dī

jab us kā husn-e-amal mujh ko mezbāñ kā lagā

agar milī bhī kabhī dhuup kī jhalak us meñ

to phir mizāj meñ 'ātir' vo sā.ebāñ kā lagā

wo aadmi mujhe pariyon ki dastan ka laga

hasin tha itna kisi aur hi jahan ka laga

wo KHadd-o-KHal the purab ke ya ki pachchhim ke

jab us ko ghaur se dekha kahan kahan ka laga

hazar waswase lahaq the jis ke milne par

jab us ke dil ko TaTola to mehrban ka laga

mila jab us se to tha itni bad-hawasi mein

ghazal mein qafiya mujh se yahan-wahan ka laga

fasurda sham thi so us ke ghar basar kar di

jab us ka husn-e-amal mujh ko mezban ka laga

agar mili bhi kabhi dhup ki jhalak us mein

to phir mizaj mein 'atir' wo saeban ka laga