wo aaj bhi qarib se kuchh kah ke haT gae

vo aaj bhī qarīb se kuchh kah ke haT ga.e

duniyā samajh rahī thī mire din palaT ga.e

jo tishna-lab na the vo the mahfil meñ ġharq-e-jām

ḳhālī the jitne jaam vo pyāsoñ meñ baT ga.e

sandal kā maiñ daraḳht nahīñ thā to kis liye

jitne the ġham ke naag mujhī se lipaT ga.e

jab haath meñ qalam thā to alfāz hī na the

jab lafz mil ga.e to mire haath kaT ga.e

jiine kā hausla kabhī marne kī aarzū

din yuuñ hī dhuup chhāñv meñ apne bhī kaT ga.e

wo aaj bhi qarib se kuchh kah ke haT gae

duniya samajh rahi thi mere din palaT gae

jo tishna-lab na the wo the mahfil mein gharq-e-jam

KHali the jitne jam wo pyason mein baT gae

sandal ka main daraKHt nahin tha to kis liye

jitne the gham ke nag mujhi se lipaT gae

jab hath mein qalam tha to alfaz hi na the

jab lafz mil gae to mere hath kaT gae

jine ka hausla kabhi marne ki aarzu

din yun hi dhup chhanw mein apne bhi kaT gae