wo aazmaen mujhe un ko aazmaun main

vo āzmā.eñ mujhe un ko āzmā.ūñ maiñ

phir āñdhiyoñ ke liye ik diyā jalā.ūñ maiñ

phir apnī yaad kī purvā.iyāñ bhī qaid kare

vo chāhtā hai agar us ko bhuul jā.ūñ maiñ

udaas āñkhoñ ko sauġhāt de ke ashkoñ kī

ye us ne ḳhuub kahā hai ki muskurā.ūñ maiñ

miyāñ ye ziist kī sachchā.iyoñ ke qisse haiñ

koī fasāna nahīñ hai jise sunā.ūñ maiñ

fasād, qatl, ta.assub, fareb, makkārī

safed-poshoñ kī bāteñ haiñ kyā batā.ūñ maiñ

isī ko kahte haiñ me.arāj kyā mohabbat kī

vo yaad aa.e to phir ḳhud ko bhuul jā.ūñ maiñ

jamāl-e-yār pe ġhazleñ to ho chukī haiñ bahut

ye sochtā huuñ use ā.īna dikhā.ūñ maiñ

wo aazmaen mujhe un ko aazmaun main

phir aandhiyon ke liye ek diya jalaun main

phir apni yaad ki purwaiyan bhi qaid kare

wo chahta hai agar us ko bhul jaun main

udas aankhon ko saughat de ke ashkon ki

ye us ne KHub kaha hai ki muskuraun main

miyan ye zist ki sachchaiyon ke qisse hain

koi fasana nahin hai jise sunaun main

fasad, qatl, tassub, fareb, makkari

safed-poshon ki baaten hain kya bataun main

isi ko kahte hain mearaj kya mohabbat ki

wo yaad aae to phir KHud ko bhul jaun main

jamal-e-yar pe ghazlen to ho chuki hain bahut

ye sochta hun use aaina dikhaun main