wo apni jhil si aankhen jo le kar ashk-bar aae

vo apnī jhiil sī āñkheñ jo le kar ashk-bār aa.e

bhalā aise meñ kis zālim ko dil par iḳhtiyār aa.e

sañvartī hī nahīñ qismat unhīñ hāthoñ se ab apnī

ki jin hāthoñ se vo qismat hazāroñ kī sañvār aa.e

nahīñ jab vāsta koī rahā apnā gulistāñ se

hameñ kyā farq hai yaaro ḳhizāñ aa.e bahār aa.e

ḳhudā jaane abhī baaqī haiñ kitne tiir tarkash meñ

ga.e jab bhī ham us ke dar pe vāpas dil-figār aa.e

jinheñ da.avā thā dil kī saḳht-jānī kā hamīñ par vo

zarā sī Thes kyā pahuñchī ki rote zār-zār aa.e

jahāñ darmāñ hai vahshat kā usī manzil se ham 'tashna'

garebāñ chāk-chāk aa.e to dāman tār-tār aa.e

wo apni jhil si aankhen jo le kar ashk-bar aae

bhala aise mein kis zalim ko dil par iKHtiyar aae

sanwarti hi nahin qismat unhin hathon se ab apni

ki jin hathon se wo qismat hazaron ki sanwar aae

nahin jab wasta koi raha apna gulistan se

hamein kya farq hai yaro KHizan aae bahaar aae

KHuda jaane abhi baqi hain kitne tir tarkash mein

gae jab bhi hum us ke dar pe wapas dil-figar aae

jinhen dawa tha dil ki saKHt-jaani ka hamin par wo

zara si Thes kya pahunchi ki rote zar-zar aae

jahan darman hai wahshat ka usi manzil se hum 'tashna'

gareban chaak-chaak aae to daman tar-tar aae