wo baat jis se ye Dar tha khuli to jaan legi

vo baat jis se ye Dar thā khulī to jaañ legī

so ab ye dekhiye jā ke vo dam kahāñ legī

milegī jalne se fursat hameñ to socheñge

panāh raakh hamārī kahāñ kahāñ legī

ye aag jis ne jalā.e haiñ shahroñ jañgal sab

kabhī bujhegī to ye sūrat-e-ḳhizāñ legī

ye din jo thā ye rahā haiñ gavāh va.adoñ kā

ye shab jo hai tire da.avoñ kā imtihāñ legī

utar ga.ī hai mire jism meñ jo ye vahshat

nikalte vaqt yahī umr-e-jāvedāñ legī

zarā sī ḳhaak lahū de ke mutma.in haiñ kyuuñ

abhī to rāh-e-safar rahravoñ ki jaañ legī

vasī.a itnī hai uryāniyat ye jaañ kī dekh

badan ke dhakne ko ye kitne āsmāñ legī

burīda sar kiye jā.eñge sab javāñ kirdār

vo chehra dekhnā 'ātif' ye dāstāñ legī

wo baat jis se ye Dar tha khuli to jaan legi

so ab ye dekhiye ja ke wo dam kahan legi

milegi jalne se fursat hamein to sochenge

panah rakh hamari kahan kahan legi

ye aag jis ne jalae hain shahron jangal sab

kabhi bujhegi to ye surat-e-KHizan legi

ye din jo tha ye raha hain gawah wadon ka

ye shab jo hai tere dawon ka imtihan legi

utar gai hai mere jism mein jo ye wahshat

nikalte waqt yahi umr-e-jawedan legi

zara si KHak lahu de ke mutmain hain kyun

abhi to rah-e-safar rahrawon ki jaan legi

wasia itni hai uryaniyat ye jaan ki dekh

badan ke dhakne ko ye kitne aasman legi

burida sar kiye jaenge sab jawan kirdar

wo chehra dekhna 'atif' ye dastan legi