wo baat kya thi ki jis ka asar nahin jata

vo baat kyā thī ki jis kā asar nahīñ jaatā

kisī kā zehn tirī baat par nahīñ jaatā

zamīñ ke itne se TukḌe pe itnī dīvāreñ

ki ek shaḳhs idhar se udhar nahīñ jaatā

vo chāñd tār-e-garebāñ meñ jā ke aTkā hai

tamām āsmāñ dāman meñ bhar nahīñ jaatā

sitam ke haath the aur āsmāñ ko chhūte the

zarā jhukā diyā hotā to sar nahīñ jaatā

vahī lapak hai sināñ meñ chamak hai ḳhanjar meñ

agarche mere qabīle kā Dar nahīñ jaatā

gumāñ ke haath se mash'al kahāñ pe jā ke girī

agar maiñ apnī hadoñ se guzar nahīñ jaatā

kuchh aur terī taraf se umiid rakhtā huuñ

maiñ is tarah kī 'ināyāt par nahīñ jaatā

vo tum hī the jo basar kar ga.e 'atīqullāh

jahāñ se itnā koī be-ḳhabar nahīñ jaatā

wo baat kya thi ki jis ka asar nahin jata

kisi ka zehn teri baat par nahin jata

zamin ke itne se TukDe pe itni diwaren

ki ek shaKHs idhar se udhar nahin jata

wo chand tar-e-gareban mein ja ke aTka hai

tamam aasman daman mein bhar nahin jata

sitam ke hath the aur aasman ko chhute the

zara jhuka diya hota to sar nahin jata

wahi lapak hai sinan mein chamak hai KHanjar mein

agarche mere qabile ka Dar nahin jata

guman ke hath se mash'al kahan pe ja ke giri

agar main apni hadon se guzar nahin jata

kuchh aur teri taraf se umid rakhta hun

main is tarah ki 'inayat par nahin jata

wo tum hi the jo basar kar gae 'atiqullah

jahan se itna koi be-KHabar nahin jata