wo baaten teri wo fasane tere

vo bāteñ tirī vo fasāne tire

shagufta shagufta bahāne tire

bas ik dāġh-e-sajda mirī kā.enāt

jabīneñ tirī āstāne tire

mazālim tire āfiyat-āfrīñ

marāsim suhāne suhāne tire

faqīroñ kī jholī na hogī tahī

haiñ bharpūr jab tak ḳhazāne tire

diloñ ko jarāhat kā lutf aa gayā

lage haiñ kuchh aise nishāne tire

asīroñ kī daulat asīrī kā ġham

na.e daam tere purāne tire

bas ik zaḳhm-e-nazzāra hissa mirā

bahāreñ tirī āshiyāne tire

faqīroñ kā jamghaT ghaḌī-do-ghaḌī

sharābeñ tirī bāda-ḳhāne tire

zamīr-e-sadaf meñ kiran kā maqām

anokhe anokhe Thikāne tire

bahār o ḳhizāñ kam-nigāhoñ ke vahm

bure yā bhale sab zamāne tire

'adam' bhī hai terā hikāyat-kada

kahāñ tak ga.e haiñ fasāne tire

wo baaten teri wo fasane tere

shagufta shagufta bahane tere

bas ek dagh-e-sajda meri kaenat

jabinen teri aastane tere

mazalim tere aafiyat-afrin

marasim suhane suhane tere

faqiron ki jholi na hogi tahi

hain bharpur jab tak KHazane tere

dilon ko jarahat ka lutf aa gaya

lage hain kuchh aise nishane tere

asiron ki daulat asiri ka gham

nae dam tere purane tere

bas ek zaKHm-e-nazzara hissa mera

bahaaren teri aashiyane tere

faqiron ka jamghaT ghaDi-do-ghaDi

sharaben teri baada-KHane tere

zamir-e-sadaf mein kiran ka maqam

anokhe anokhe Thikane tere

bahaar o KHizan kam-nigahon ke wahm

bure ya bhale sab zamane tere

'adam' bhi hai tera hikayat-kada

kahan tak gae hain fasane tere