وہ بیخود شباب وہ سیمیں بدن کہاں

وہ بیخود شباب وہ سیمیں بدن کہاں

میں غم نصیب کشتۂ رنج و محن کہاں

دل میں کسی کی یاد نے پھر لی ہیں چٹکیاں

آنکھوں میں چھپ گیا ہے وہ غنچہ دہن کہاں

دنیائے رنگ و بو میں اسی کا تھا اہتمام

وہ گل بدن نہیں تو بہار چمن کہاں

آرام آ چکا ہے دل بے قرار کو

اگلی سی وہ خلش وہ کسک وہ چبھن کہاں

فکر معاش نے ہمیں سب کچھ بھلا دیا

اب وہ بساط عیش وہ بزم سخن کہاں

مرتے ہیں اب بھی بادہ و شاہد کے نام پر

اہل وطن میں جذبۂ حب وطن کہاں

سارا جہان اپنا وطن اب تو ہے بہارؔ

کیوں مجھ سے پوچھیے کہ ہے میرا وطن کہاں