wo bhi ho gae shamil mere nukta-chinon mein

vo bhī ho ga.e shāmil mere nukta-chīnoñ meñ

maiñ ne jin ko paalā thā apnī āstīnoñ meñ

aa.ine parakhne kā tajraba hameñ bhī hai

ek umr guzrī hai apnī mah-jabīnoñ meñ

bārhā mohabbat ke biij bo ke dekhā hai

nafrateñ hī ugtī haiñ āj-kal zamīnoñ meñ

kyā bachāte jaañ apnī har taraf hī qātil the

aur jo muhāfiz the mil ga.e kamīnoñ meñ

sāmnā to hone do ḳhud hī jaan jāoge

tum ko ham ne dekhā hai sirf dūr-bīnoñ meñ

nazriya badal jaa.e yā nazar badal jaa.e

baal aa hī jaate haiñ dil ke ābgīnoñ meñ

ab kahāñ 'zafar' sāhib husn meñ salīqa hai

ishq bhī nahīñ miltā ab kahīñ qarīnoñ meñ

wo bhi ho gae shamil mere nukta-chinon mein

main ne jin ko pala tha apni aastinon mein

aaine parakhne ka tajraba hamein bhi hai

ek umr guzri hai apni mah-jabinon mein

barha mohabbat ke bij bo ke dekha hai

nafraten hi ugti hain aaj-kal zaminon mein

kya bachate jaan apni har taraf hi qatil the

aur jo muhafiz the mil gae kaminon mein

samna to hone do KHud hi jaan jaoge

tum ko hum ne dekha hai sirf dur-binon mein

nazriya badal jae ya nazar badal jae

baal aa hi jate hain dil ke aabginon mein

ab kahan 'zafar' sahib husn mein saliqa hai

ishq bhi nahin milta ab kahin qarinon mein