wo bhi mahir tha bahut baat ko uljhane mein

vo bhī māhir thā bahut baat ko uljhāne meñ

ham bhī Darte the kisī ek taraf jaane meñ

tez-raftārī meñ rakkhā nahīñ sāñsoñ kā hisāb

'umr ko bhuul ga.e vaqt ko chamkāne meñ

ik safar aur tarah kā abhī karnā hai hameñ

aap se aap kī tasvīr talak jaane meñ

ḳhuub tarkīb nikālī thī na piine kī magar

jaam TuuTā hī nahīñ jaam se Takrāne meñ

shukr ye hai ki mulāqāt ziyāda na chalī

vaqt kaTtā hī na thā vaqt ko duhrāne meñ

bhūlne meñ to use der ziyāda na lagī

ġham-gusāroñ ne bahut vaqt liyā jaane meñ

haiñ to nādān magar itne bhī nādān nahīñ

baat bantī ho to aa jaate haiñ bahkāne meñ

kyā ġham-e-dahr koī yaad agar zinda ho

kyā shab-e-hijr agar dhuup ho paimāne meñ

kyā kareñ kaifiyat-e-be-ḳhabarī kā 'shāriq'

yaar anjān hue jaate haiñ anjāne meñ

wo bhi mahir tha bahut baat ko uljhane mein

hum bhi Darte the kisi ek taraf jaane mein

tez-raftari mein rakkha nahin sanson ka hisab

'umr ko bhul gae waqt ko chamkane mein

ek safar aur tarah ka abhi karna hai hamein

aap se aap ki taswir talak jaane mein

KHub tarkib nikali thi na pine ki magar

jam TuTa hi nahin jam se Takrane mein

shukr ye hai ki mulaqat ziyaada na chali

waqt kaTta hi na tha waqt ko duhrane mein

bhulne mein to use der ziyaada na lagi

gham-gusaron ne bahut waqt liya jaane mein

hain to nadan magar itne bhi nadan nahin

baat banti ho to aa jate hain bahkane mein

kya gham-e-dahr koi yaad agar zinda ho

kya shab-e-hijr agar dhup ho paimane mein

kya karen kaifiyat-e-be-KHabari ka 'shaariq'

yar anjaan hue jate hain anjaane mein