wo but be-sabab kyon KHafa ho gaya

vo but be-sabab kyoñ ḳhafā ho gayā

ḳhudāvand-e-ālam ye kyā ho gayā

vahī dil asīr-e-balā ho gayā

jise ishq-e-zulf-e-dutā ho gayā

na dīdār kī taab laa.e kalīm

vo jis vaqt jalva-numā ho gayā

vahāñ us ne pahnā jo dhānī libās

yahāñ zaḳhm dil kā harā ho gayā

banāyā hai tum ne jo surme kā ḳhaal

to ruḳh aur bhī ḳhushnumā ho gayā

nahā dho ke us ne kiyā jab siñghār

to putlā vo ik nuur kā ho gayā

tasallī sitam kī talāfī huī

har ik kār-e-bejā bajā ho gayā

hayāt-e-abad us ko hāsil huī

tirī raah meñ jo fanā ho gayā

ye but ham se ho jā.eñge raam ḳhud

agar mehrbāñ vo ḳhudā ho gayā

maiñ kis muñh se 'sābir' karūñ shukr-e-yār

mujhe bosa-e-lab atā ho gayā

wo but be-sabab kyon KHafa ho gaya

KHudawand-e-alam ye kya ho gaya

wahi dil asir-e-bala ho gaya

jise ishq-e-zulf-e-duta ho gaya

na didar ki tab lae kalim

wo jis waqt jalwa-numa ho gaya

wahan us ne pahna jo dhani libas

yahan zaKHm dil ka hara ho gaya

banaya hai tum ne jo surme ka KHal

to ruKH aur bhi KHushnuma ho gaya

naha dho ke us ne kiya jab singhaar

to putla wo ek nur ka ho gaya

tasalli sitam ki talafi hui

har ek kar-e-beja baja ho gaya

hayat-e-abad us ko hasil hui

teri rah mein jo fana ho gaya

ye but hum se ho jaenge ram KHud

agar mehrban wo KHuda ho gaya

main kis munh se 'sabir' karun shukr-e-yar

mujhe bosa-e-lab ata ho gaya