wo dard-e-dil bhi nahin chashm-e-KHun-fishan bhi nahin

vo dard-e-dil bhī nahīñ chashm-e-ḳhūñ-fishāñ bhī nahīñ

kabhī jo thā vo ab andāz-e-gulsitāñ bhī nahīñ

ilāj-e-dard-e-mohabbat to kar nahīñ sakte

tumhāre qabze meñ kyā marg-e-nā-gahāñ bhī nahīñ

vo is maqām se guzre haiñ dil ye kahtā hai

jhukā hai sar ki jahāñ koī āstāñ bhī nahīñ

isī chaman meñ ka.ī baar sho'le bhaḌke haiñ

mirī navā kā koī ab mizāj-dāñ bhī nahīñ

sukūt kitne marāhil ke ba.ad aatā hai

vo mutma.in haiñ mire lab pe ab fuġhāñ bhī nahīñ

ye aur baat qafas meñ guzār duuñ din-rāt

mirā maqām to varna ye gulsitāñ bhī nahīñ

shab-e-firāq meñ andesha-e-sahar kaisā

ye vo zamīñ hai jahāñ koī āsmāñ bhī nahīñ

wo dard-e-dil bhi nahin chashm-e-KHun-fishan bhi nahin

kabhi jo tha wo ab andaz-e-gulsitan bhi nahin

ilaj-e-dard-e-mohabbat to kar nahin sakte

tumhaare qabze mein kya marg-e-na-gahan bhi nahin

wo is maqam se guzre hain dil ye kahta hai

jhuka hai sar ki jahan koi aastan bhi nahin

isi chaman mein kai bar sho'le bhaDke hain

meri nawa ka koi ab mizaj-dan bhi nahin

sukut kitne marahil ke baad aata hai

wo mutmain hain mere lab pe ab fughan bhi nahin

ye aur baat qafas mein guzar dun din-raat

mera maqam to warna ye gulsitan bhi nahin

shab-e-firaq mein andesha-e-sahar kaisa

ye wo zamin hai jahan koi aasman bhi nahin