wo dekha KHwab qasir jis se hai apni zaban aur hum

vo dekhā ḳhvāb qāsir jis se hai apnī zabāñ aur ham

ki goyā ek jā hai us meñ hai vo naujavāñ aur ham

vo ro ro mujh se kahtā hai ḳhudā kī bāteñ haiñ varna

bhalā Tuk dil meñ apne ġhaur kar tū ye makāñ aur ham

jo pūchhā qais se lailā ne jañgal meñ akele ho

to bole ai nahīñ vahshat hai aur āh-o-fuġhāñ aur ham

ajī gaḌbaḌ rahī hai aql apne sab farishtoñ se

paḌe phirte haiñ bāham sair karte qudsiyāñ aur ham

nashā hai ālam-e-mastī hai be-qaidī hai rindī hai

kahāñ ab zohd-o-taqvā hai ḳharābāt-e-muġhāñ aur ham

niyābat ham ko rizvāñ kī milī maulā ke sadqe se

vagarna ohda-e-darbānī-e-bāġh-e-jināñ aur ham

ajab rañgīniyāñ bātoñ meñ kuchh hotī haiñ ai 'inshā'

baham ho baiThte haiñ jab sa.ādat-yār-ḳhāñ aur ham

wo dekha KHwab qasir jis se hai apni zaban aur hum

ki goya ek ja hai us mein hai wo naujawan aur hum

wo ro ro mujh se kahta hai KHuda ki baaten hain warna

bhala Tuk dil mein apne ghaur kar tu ye makan aur hum

jo puchha qais se laila ne jangal mein akele ho

to bole ai nahin wahshat hai aur aah-o-fughan aur hum

aji gaDbaD rahi hai aql apne sab farishton se

paDe phirte hain baham sair karte qudsiyan aur hum

nasha hai aalam-e-masti hai be-qaidi hai rindi hai

kahan ab zohd-o-taqwa hai KHarabaat-e-mughan aur hum

niyabat hum ko rizwan ki mili maula ke sadqe se

wagarna ohda-e-darbani-e-bagh-e-jinan aur hum

ajab ranginiyan baaton mein kuchh hoti hain ai 'insha'

baham ho baiThte hain jab saadat-yar-KHan aur hum