wo dekhne hamein Tuk bimari mein na aaya

vo dekhne hameñ Tuk bīmārī meñ na aayā

sau baar āñkheñ kholīñ bālīñ se sar uThāyā

gulshan ke tā.eroñ ne kyā be-muravvatī kī

yak barg-e-gul qafas meñ ham tak na koī laayā

be-hech us kā ġhussa yaaro balā-e-jāñ hai

hargiz manā na ham se bahterā hī manāyā

qadd-e-buland agarche be-lutf bhī nahīñ hai

sarv-e-chaman meñ lekin andāza vo na paayā

naqsha ajab hai us kā naqqāsh ne azal ke

matbū aisā chehra koī na phir banāyā

shab ko nashe meñ bāham thī guftugū-e-darham

us mast ne jhañkāyā yaanī bahut jhukāyā

dil-bastagī meñ khulnā us kā na us se dekhā

baḳht-e-nigūñ ko ham ne sau baar āzmāyā

āshiq jahāñ huā hai be-Dhañgiyāñ hī kī haiñ

is 'mīr'-e-be-ḳhirad ne kab Dhab se dil lagāyā

wo dekhne hamein Tuk bimari mein na aaya

sau bar aankhen kholin baalin se sar uThaya

gulshan ke taeron ne kya be-murawwati ki

yak barg-e-gul qafas mein hum tak na koi laya

be-hech us ka ghussa yaro bala-e-jaan hai

hargiz mana na hum se bahtera hi manaya

qadd-e-buland agarche be-lutf bhi nahin hai

sarw-e-chaman mein lekin andaza wo na paya

naqsha ajab hai us ka naqqash ne azal ke

matbu aisa chehra koi na phir banaya

shab ko nashe mein baham thi guftugu-e-darham

us mast ne jhankaya yani bahut jhukaya

dil-bastagi mein khulna us ka na us se dekha

baKHt-e-nigun ko hum ne sau bar aazmaya

aashiq jahan hua hai be-Dhangiyan hi ki hain

is 'mir'-e-be-KHirad ne kab Dhab se dil lagaya