wo dilkashi wo raushni-e-baam-o-dar gai

vo dilkashī vo raushnī-e-bām-o-dar ga.ī

tum kyā ga.e ki raunaq-e-shām-o-sahar ga.ī

chashm-e-karam kī ḳhair ajab kaam kar ga.ī

be-rangī-e-hayāt meñ sau rang bhar ga.ī

maiñ intizār hī meñ rahā aur zindagī

chup-chāp mere paas se ho kar guzar ga.ī

ashkoñ kī buuñd yaar kī tasvīr dekh kar

aurāq-e-gul pe sūrat-e-shabnam bikhar ga.ī

ahd-e-vafā-e-dost ho yā intizār-e-dost

har baat e.atibār kī had se guzar ga.ī

aa.ī jo terī yaad to mānind-e-bū-e-gul

saarī fazā-e-shauq ko maḳhmūr kar ga.ī

itnā to merī aah kā radd-e-amal huā

un kī jabīñ pe ek shikan sī ubhar ga.ī

milte hī aaj un kī junūñ-āfrīñ nigāh

mujh ko har ek chiiz se begāna kar ga.ī

'jauhar' na pūchh umr-e-gurezāñ kī sarguzasht

jis tarah bhī guzar ga.ī āḳhir guzar ga.ī

wo dilkashi wo raushni-e-baam-o-dar gai

tum kya gae ki raunaq-e-sham-o-sahar gai

chashm-e-karam ki KHair ajab kaam kar gai

be-rangi-e-hayat mein sau rang bhar gai

main intizar hi mein raha aur zindagi

chup-chap mere pas se ho kar guzar gai

ashkon ki bund yar ki taswir dekh kar

auraq-e-gul pe surat-e-shabnam bikhar gai

ahd-e-wafa-e-dost ho ya intizar-e-dost

har baat eatibar ki had se guzar gai

aai jo teri yaad to manind-e-bu-e-gul

sari faza-e-shauq ko maKHmur kar gai

itna to meri aah ka radd-e-amal hua

un ki jabin pe ek shikan si ubhar gai

milte hi aaj un ki junun-afrin nigah

mujh ko har ek chiz se begana kar gai

'jauhar' na puchh umr-e-gurezan ki sarguzasht

jis tarah bhi guzar gai aaKHir guzar gai