wo din kab ke bit gae jab dil sapnon se bahalta tha

vo din kab ke biit ga.e jab dil sapnoñ se bahaltā thā

ghar meñ koī aa.e ki na aa.e ek diyā sā jaltā thā

yaad aatī haiñ vo shāmeñ jab rasm-o-rāh kisī se thī

ham bechain se hone lagte juuñ juuñ ye din Dhaltā thā

un galiyoñ meñ ab sunte haiñ rāteñ bhī so jaatī haiñ

jin galiyoñ meñ ham phirte the jahāñ vo chāñd nikaltā thā

vo mānūs salone chehre jaane ab kis haal meñ haiñ

jin ko dekh ke ḳhaak kā zarra zarra āñkheñ maltā thā

koī purānā sāthī bhī shāyad hī hameñ pahchān sake

varna ik din shahr-e-vafā meñ apnā sikka chaltā thā

shāyad apnā pyaar hī jhūTā thā varna dastūr ye thā

miTTī meñ jo biich bhī boyā jaatā thā vo phaltā thā

ab ke aise patjhaḌ aa.ī suukh ga.ī Daalī Daalī

aise Dhañg se koī paudā kab poshāk badaltā thā

aaj shab-e-ġham raas aa.e to apnī baat bhī rah jaa.e

andhiyāre kī kokh meñ yuuñ to pahle sūraj paltā thā

duniyā bhar kī rām-kahānī kis kis Dhañg se kah Daalī

apnī kahne jab baiThe to ik ik lafz pighaltā thā

wo din kab ke bit gae jab dil sapnon se bahalta tha

ghar mein koi aae ki na aae ek diya sa jalta tha

yaad aati hain wo shamen jab rasm-o-rah kisi se thi

hum bechain se hone lagte jun jun ye din Dhalta tha

un galiyon mein ab sunte hain raaten bhi so jati hain

jin galiyon mein hum phirte the jahan wo chand nikalta tha

wo manus salone chehre jaane ab kis haal mein hain

jin ko dekh ke KHak ka zarra zarra aankhen malta tha

koi purana sathi bhi shayad hi hamein pahchan sake

warna ek din shahr-e-wafa mein apna sikka chalta tha

shayad apna pyar hi jhuTa tha warna dastur ye tha

miTTi mein jo bich bhi boya jata tha wo phalta tha

ab ke aise patjhaD aai sukh gai Dali Dali

aise Dhang se koi pauda kab poshak badalta tha

aaj shab-e-gham ras aae to apni baat bhi rah jae

andhiyare ki kokh mein yun to pahle suraj palta tha

duniya bhar ki ram-kahani kis kis Dhang se kah Dali

apni kahne jab baiThe to ek ek lafz pighalta tha