wo dur hai nazron se magar dil mein makin hai

vo duur hai nazroñ se magar dil meñ makīñ hai

duniyā ko yaqīñ ho ki na ho mujh ko yaqīñ hai

kambaḳht ko nākāmī-e-qismat kā yaqīñ hai

ab hālat-e-dil qābil-e-islāh nahīñ hai

sunte haiñ dar-e-ġhair hai aur un kī jabīñ hai

allāh ke ghar der hai andher nahīñ hai

merī tarah is karb se guzre na koī aur

hai ruuh kahīñ aur tan-e-be-rūh kahīñ hai

kis soch meñ hai bāñdh kamar kuud bhañvar meñ

Dūbegā jahāñ manzil-e-maqsūd vahīñ hai

kyoñ jaan liyā kartā hai insān kī insāñ

ye bhī to nahīñ dekhtā sajde meñ jabīñ hai

shāmil haiñ sadā sa'y-e-‘amal meñ safā marva

kā'be kī zamīñ asl meñ firdaus-e-barīñ hai

maiñ chāhūñ to kar saktā huuñ tum chāho to kar lo

koshish kisī insān ke qabze meñ nahīñ hai

phir 'irtizā' mahfil meñ numāyāñ nazar aayā

afvāh uḌā rakkhī hai vo gosha-nashīñ hai

wo dur hai nazron se magar dil mein makin hai

duniya ko yaqin ho ki na ho mujh ko yaqin hai

kambaKHt ko nakaami-e-qismat ka yaqin hai

ab haalat-e-dil qabil-e-islah nahin hai

sunte hain dar-e-ghair hai aur un ki jabin hai

allah ke ghar der hai andher nahin hai

meri tarah is karb se guzre na koi aur

hai ruh kahin aur tan-e-be-ruh kahin hai

kis soch mein hai bandh kamar kud bhanwar mein

Dubega jahan manzil-e-maqsud wahin hai

kyon jaan liya karta hai insan ki insan

ye bhi to nahin dekhta sajde mein jabin hai

shamil hain sada sa'y-e-‘amal mein safa marwa

ka'be ki zamin asl mein firdaus-e-barin hai

main chahun to kar sakta hun tum chaho to kar lo

koshish kisi insan ke qabze mein nahin hai

phir 'irtiza' mahfil mein numayan nazar aaya

afwah uDa rakkhi hai wo gosha-nashin hai