wo ek ashk jo hasil hai zindagani ka

vo ek ashk jo hāsil hai zindagānī kā

tamām 'umr ke manzar nichoḌ kar niklā

phir ek ḳhvāb ko bedār kar diyā kis ne

ye kaun raat ke shāne jhiñjhoḌ kar niklā

ḳhushī huī abhī maujūd huuñ kahīñ us meñ

mirī taraf se vo muñh apnā moḌ kar niklā

hisāb-e-'umr pe hairāñ haiñ ḳhizr bhī mere

jo tere hijr kī rātoñ ko joḌ kar niklā

kiyā thā dhuup kī shiddat ko zeb-tan maiñ ne

udhar vo chāñdnī rātoñ ko oḌh kar niklā

gaḌā ke daañt gale meñ lahū piyā merā

vo ik ḳhayāl ki mujh ko bhañbhoḌ kar niklā

wo ek ashk jo hasil hai zindagani ka

tamam 'umr ke manzar nichoD kar nikla

phir ek KHwab ko bedar kar diya kis ne

ye kaun raat ke shane jhinjhoD kar nikla

KHushi hui abhi maujud hun kahin us mein

meri taraf se wo munh apna moD kar nikla

hisab-e-'umr pe hairan hain KHizr bhi mere

jo tere hijr ki raaton ko joD kar nikla

kiya tha dhup ki shiddat ko zeb-tan main ne

udhar wo chandni raaton ko oDh kar nikla

gaDa ke dant gale mein lahu piya mera

wo ek KHayal ki mujh ko bhanbhoD kar nikla