wo ek shaKHs jo manzil bhi rahguzar bhi hai

vo ek shaḳhs jo manzil bhī rahguzār bhī hai

nishāt-o-kaif meñ Duubā hai ġham-gusār bhī hai

majāz aur haqīqat kā aa.ina ban kar

hamārī zaat yahāñ lail bhī nahār bhī hai

tumhāre kamre meñ gulshan kā rañg-rūp milā

yahāñ to mez pe phūloñ ke saath ḳhaar bhī hai

tumhārī zaat se is dil kā rābta bhī nahīñ

tumhārī yaad meñ dil merā be-qarār bhī hai

fasīl-e-āb pe Thahrī hai chāñdnī kī dulhan

shafaq ke shāne pe zulfoñ kā ābshār bhī hai

'asad' vo kaisā tilismī vajūd rakhtā hai

usī se buġhz-o-adāvat usī se pyaar bhī hai

wo ek shaKHs jo manzil bhi rahguzar bhi hai

nishat-o-kaif mein Duba hai gham-gusar bhi hai

majaz aur haqiqat ka aaina ban kar

hamari zat yahan lail bhi nahaar bhi hai

tumhaare kamre mein gulshan ka rang-rup mila

yahan to mez pe phulon ke sath KHar bhi hai

tumhaari zat se is dil ka rabta bhi nahin

tumhaari yaad mein dil mera be-qarar bhi hai

fasil-e-ab pe Thahri hai chandni ki dulhan

shafaq ke shane pe zulfon ka aabshaar bhi hai

'asad' wo kaisa tilismi wajud rakhta hai

usi se bughz-o-adawat usi se pyar bhi hai