wo gham meri palkon se numayan bhi nahin hai

vo ġham mirī palkoñ se numāyāñ bhī nahīñ hai

yuuñ jashn huā hai ki charāġhāñ bhī nahīñ hai

patthar bhī koī mārne vaalā nahīñ miltā

ā.īna kisī aks se hairāñ bhī nahīñ hai

ik josh-e-talab hai ki use DhūñD rahā huuñ

mil jā.egā vo shaḳhs ye imkāñ bhī nahīñ hai

shahroñ se huiiñ ishq kī be-tābiyāñ ruḳhsat

dīvāngī-e-dil ko bayābāñ bhī nahīñ hai

lauT aa.egā ik roz yahī ḳhvāb meñ apne

yuuñ us se ba-zāhir koī paimāñ bhī nahīñ hai

āñkhoñ meñ bahut roz se aañsū nahīñ aa.e

dariyā kā mire dasht meñ imkāñ bhī nahīñ hai

mat dekh mire chehre pe is hijr kā manzar

nazzāra tirī aañkh ke shāyāñ bhī nahīñ hai

le jā.eñgī manzil pe usī dost kī āñkheñ

raste meñ musāfir ke charāġhāñ bhī nahīñ hai

ik dard-e-tamannā ko liye phirtā huuñ 'ādil'

is sachchī kahānī kā to unvāñ bhī nahīñ hai

wo gham meri palkon se numayan bhi nahin hai

yun jashn hua hai ki charaghan bhi nahin hai

patthar bhi koi marne wala nahin milta

aaina kisi aks se hairan bhi nahin hai

ek josh-e-talab hai ki use DhunD raha hun

mil jaega wo shaKHs ye imkan bhi nahin hai

shahron se huin ishq ki be-tabiyan ruKHsat

diwangi-e-dil ko bayaban bhi nahin hai

lauT aaega ek roz yahi KHwab mein apne

yun us se ba-zahir koi paiman bhi nahin hai

aankhon mein bahut roz se aansu nahin aae

dariya ka mere dasht mein imkan bhi nahin hai

mat dekh mere chehre pe is hijr ka manzar

nazzara teri aankh ke shayan bhi nahin hai

le jaengi manzil pe usi dost ki aankhen

raste mein musafir ke charaghan bhi nahin hai

ek dard-e-tamanna ko liye phirta hun 'adil'

is sachchi kahani ka to unwan bhi nahin hai