wo gham qubul hai jo teri chashm se mile

vo ġham qubūl hai jo tirī chashm se mile

ham ko hunar tamām usī zaḳhm se mile

raushan hai saarī zindagī is dil kī aag se

aur dil ko aañch ik suḳhan-e-garm se mile

jab rañg-o-nūr-o-naġhma nahīñ iḳhtiyār meñ

ik e'tibār-e-shauq hī us bazm se mile

dil ko lapeT letā hai ik reshmīñ ḳhayāl

jab bhī nigāh us nigah-e-narm se mile

is dil ke saare ḳhvāb mohabbat ke sab gulāb

ik she'r se khile kabhī ik nazm se mile

hamrāh chal rahā thā falak bhī tamām shab

yuuñ ahl-e-ḳhāk-o-ḳhvāb mah-o-najm se mile

dil meñ to un kī aab koī dekhtā na thā

durr-e-samīn the jo dar-chashm se mile

wo gham qubul hai jo teri chashm se mile

hum ko hunar tamam usi zaKHm se mile

raushan hai sari zindagi is dil ki aag se

aur dil ko aanch ek suKHan-e-garm se mile

jab rang-o-nur-o-naghma nahin iKHtiyar mein

ek e'tibar-e-shauq hi us bazm se mile

dil ko lapeT leta hai ek reshmin KHayal

jab bhi nigah us nigah-e-narm se mile

is dil ke sare KHwab mohabbat ke sab gulab

ek she'r se khile kabhi ek nazm se mile

hamrah chal raha tha falak bhi tamam shab

yun ahl-e-KHak-o-KHwab mah-o-najm se mile

dil mein to un ki aab koi dekhta na tha

durr-e-samin the jo dar-chashm se mile