wo giri hai barq ki al-aman mere aashiyan-e-qarar par

vo girī hai barq ki al-amān mire āshiyān-e-qarār par

magar e'timād hai aaj bhī tirī baat par tire pyaar par

mirī sab du'ā.eñ qubūl haiñ mujhe aur kuchh nahīñ chāhiye

mire paas hai mai-e-ġham-rubā mirā sar hai zānu-e-yār par

mirī kāmyābī-e-ishq par ye fazā.eñ kyoñ nahīñ jhūmtīñ

abhī raushnī sī huī thī kuchh abhī aa.e the vo mazār par

yahī bandagī hai mire liye yahī sajda hai mire vāste

nazar uTThī uTh ke Thahar ga.ī tirī ḳhāk-e-rāhguzār par

mujhe kyā satā.egī kashmakash maiñ chaman kā nabz-shanās huuñ

na ḳhizāñ se mujh ko kabīdagī na nigāh merī bahār par

ye guloñ pe kis ne sitam kyā huā kaun ġhunchoñ se be-adab

koī gul-farosh na ho yahāñ hai shikan jabīn-e-bahār par

ye navāzish-e-sitam-āfrīñ vo udhar se ho ke guzar ga.e

ki nigāh bhī na uThā sake mirī hasratoñ ke mazār par

yahī merā maslak-e-zīst hai yahī merā maz.hab-e-ain hai

na ḳhizāñ kī hajv likhī kabhī na kahā qasīda bahār par

ye chamak uThā bhī to tā-ba-kai ye rasā huā bhī to tā-kujā

mujhe ilm-e-muddat-e-umr hai hañsī aa rahī hai sharār par

vahī apnā 'bismil'-e-bāda-kash jo milā bhī hai to kahāñ milā

kabhī mai-kade kī fazāoñ meñ kabhī āstāna-e-yār par

wo giri hai barq ki al-aman mere aashiyan-e-qarar par

magar e'timad hai aaj bhi teri baat par tere pyar par

meri sab du'aen qubul hain mujhe aur kuchh nahin chahiye

mere pas hai mai-e-gham-ruba mera sar hai zanu-e-yar par

meri kaamyabi-e-ishq par ye fazaen kyon nahin jhumtin

abhi raushni si hui thi kuchh abhi aae the wo mazar par

yahi bandagi hai mere liye yahi sajda hai mere waste

nazar uTThi uTh ke Thahar gai teri KHak-e-rahguzar par

mujhe kya sataegi kashmakash main chaman ka nabz-shanas hun

na KHizan se mujh ko kabidagi na nigah meri bahaar par

ye gulon pe kis ne sitam kya hua kaun ghunchon se be-adab

koi gul-farosh na ho yahan hai shikan jabin-e-bahaar par

ye nawazish-e-sitam-afrin wo udhar se ho ke guzar gae

ki nigah bhi na uTha sake meri hasraton ke mazar par

yahi mera maslak-e-zist hai yahi mera mazhab-e-ain hai

na KHizan ki hajw likhi kabhi na kaha qasida bahaar par

ye chamak uTha bhi to ta-ba-kai ye rasa hua bhi to ta-kuja

mujhe ilm-e-muddat-e-umr hai hansi aa rahi hai sharar par

wahi apna 'bismil'-e-baada-kash jo mila bhi hai to kahan mila

kabhi mai-kade ki fazaon mein kabhi aastana-e-yar par