wo haal-e-dil hai tera sath KHatm hone par

vo hāl-e-dil hai tirā saath ḳhatm hone par

vahī jo hotā hai barsāt ḳhatm hone par

maiñ hausle se rahā ḳhauf ke samundar meñ

magar maiñ gir paḌā ḳhadshāt ḳhatm hone par

mire javāb se sab lā-javāb haiñ lekin

maiñ muztarib huuñ savālāt ḳhatm hone par

vo ik hujūm jo mujh ko uThā.e phirtā thā

nazar na aayā mafādāt ḳhatm hone par

miyāñ ye sunte chale aa.e haiñ buzurgoñ se

ki ḳhatm hotī haiñ ādāt ḳhatm hone par

kuchh aise log bhī ai nasl-e-nau hayāt haiñ jo

sulag rahe haiñ rivāyāt ḳhatm hone par

suno fazāoñ ko masmūm is qadar na karo

ki aa ga.e haiñ nabātāt ḳhatm hone par

kahīñ zamāna kisī ke liye rukā hai kabhī

koī na hogā tirī baat ḳhatm hone par

hai badduā yā koī sehr hai 'qamar' ham par

añdherā baḌhtā hai har raat ḳhatm hone par

wo haal-e-dil hai tera sath KHatm hone par

wahi jo hota hai barsat KHatm hone par

main hausle se raha KHauf ke samundar mein

magar main gir paDa KHadshat KHatm hone par

mere jawab se sab la-jawab hain lekin

main muztarib hun sawalat KHatm hone par

wo ek hujum jo mujh ko uThae phirta tha

nazar na aaya mafadat KHatm hone par

miyan ye sunte chale aae hain buzurgon se

ki KHatm hoti hain aadat KHatm hone par

kuchh aise log bhi ai nasl-e-nau hayat hain jo

sulag rahe hain riwayat KHatm hone par

suno fazaon ko masmum is qadar na karo

ki aa gae hain nabaatat KHatm hone par

kahin zamana kisi ke liye ruka hai kabhi

koi na hoga teri baat KHatm hone par

hai baddua ya koi sehr hai 'qamar' hum par

andhera baDhta hai har raat KHatm hone par