wo hamare hote hote rah gae

vo hamāre hote hote rah ga.e

aur ham sapne sanjote rah ga.e

dil bichhā ke ham kisī kī raah meñ

sirf apnā vaqt khote rah ga.e

phuul bhī gulshan ke sab murjhā ga.e

aur ham buuTe hī bote rah ga.e

pyaar kā sāgar simaT kar rah gayā

ham to bas palkeñ bhigote rah ga.e

chāñd ne bāñdhī thī Dorī ġhair se

aur ham motī pirote rah ga.e

ye 'kashish' jin ke liye jagtī rahī

saath vo ġhairoñ ke sote rah ga.e

wo hamare hote hote rah gae

aur hum sapne sanjote rah gae

dil bichha ke hum kisi ki rah mein

sirf apna waqt khote rah gae

phul bhi gulshan ke sab murjha gae

aur hum buTe hi bote rah gae

pyar ka sagar simaT kar rah gaya

hum to bas palken bhigote rah gae

chand ne bandhi thi Dori ghair se

aur hum moti pirote rah gae

ye 'kashish' jin ke liye jagti rahi

sath wo ghairon ke sote rah gae