wo hansna yaad aata hai wo rona yaad aata hai

vo hañsnā yaad aatā hai vo ronā yaad aatā hai

tujhe ai zindagī pā kar vo khonā yaad aatā hai

vo shab bhar jāgnā chāhat meñ ik gulzār lamhe kī

vo terī god meñ sar rakh ke sonā yaad aatā hai

tire dil kī zamīñ par gul khilānā apnī ulfat ke

tire āñkhoñ meñ apne ḳhvāb bonā yaad aatā hai

vo ḳhalvat meñ bhī terā chūḌiyoñ se khelte rahnā

mire hamrāh ho kar bhī na honā yaad aatā hai

mujhe to yaad haiñ ab tak tumhārī surmagīñ āñkheñ

tumheñ bhī kyā vo ik laḌkā salonā yaad aatā hai

kahāñ ham bhuul paa.e haiñ tirī bāñhoñ kā vo takiya

vo tere maḳhmalīñ tan kā bichhaunā yaad aatā hai

mujhe mas.hūr rakhne ko tirā kyā-kyā jatan karnā

vo jaadū yaad aatā hai vo Tonā yaad aatā hai

inhīñ hāthoñ tujhe phir sauñp denā ġhair ke hāthoñ

safīna apnī chāhat kā Dubonā yaad aatā hai

mahak apnī mulāqātoñ kī hai jin meñ basī ab tak

tumhāre ghar kā vo ik ek konā yaad aatā hai

wo hansna yaad aata hai wo rona yaad aata hai

tujhe ai zindagi pa kar wo khona yaad aata hai

wo shab bhar jagna chahat mein ek gulzar lamhe ki

wo teri god mein sar rakh ke sona yaad aata hai

tere dil ki zamin par gul khilana apni ulfat ke

tere aankhon mein apne KHwab bona yaad aata hai

wo KHalwat mein bhi tera chuDiyon se khelte rahna

mere hamrah ho kar bhi na hona yaad aata hai

mujhe to yaad hain ab tak tumhaari surmagin aankhen

tumhein bhi kya wo ek laDka salona yaad aata hai

kahan hum bhul pae hain teri banhon ka wo takiya

wo tere maKHmalin tan ka bichhauna yaad aata hai

mujhe mashur rakhne ko tera kya-kya jatan karna

wo jadu yaad aata hai wo Tona yaad aata hai

inhin hathon tujhe phir saunp dena ghair ke hathon

safina apni chahat ka Dubona yaad aata hai

mahak apni mulaqaton ki hai jin mein basi ab tak

tumhaare ghar ka wo ek ek kona yaad aata hai