wo ek chaTan jo pani hui saliqe se

vo ik chaTān jo paanī huī salīqe se

nadī kuchh aur siyānī huī salīqe se

nigah kī dhaar meñ ḳhanjar kā zā.iqa utrā

diloñ kī baat zabānī huī salīqe se

ise bhī khā ga.ī tahzīb dīmakoñ kī tarah

na.ī kitāb purānī huī salīqe se

vo ek raat jo pahlū meñ mutma.in thī bahut

qayāmatoñ kī nishānī huī salīqe se

uThe jo shahr se sahrā pe vo baras bhī ga.e

ġhamoñ kī naql-e-makānī huī salīqe se

mire lahū se haiñ gul-rañg hasrateñ us kī

sazā kī shaam suhānī huī salīqe se

kisī kā qurb kabūtar ke pañkh jaisā thā

badan kī aag bhī paanī huī salīqe se

wo ek chaTan jo pani hui saliqe se

nadi kuchh aur siyani hui saliqe se

nigah ki dhaar mein KHanjar ka zaiqa utra

dilon ki baat zabani hui saliqe se

ise bhi kha gai tahzib dimakon ki tarah

nai kitab purani hui saliqe se

wo ek raat jo pahlu mein mutmain thi bahut

qayamaton ki nishani hui saliqe se

uThe jo shahr se sahra pe wo baras bhi gae

ghamon ki naql-e-makani hui saliqe se

mere lahu se hain gul-rang hasraten us ki

saza ki sham suhani hui saliqe se

kisi ka qurb kabutar ke pankh jaisa tha

badan ki aag bhi pani hui saliqe se