wo ek nazar jo dil se jigar tak utar gai

vo ik nazar jo dil se jigar tak utar ga.ī

afsāna-e-hayāt kī takmīl kar ga.ī

kyā pūchhte ho mujh se javānī kidhar ga.ī

bas itnā yaad hai idhar aa.ī udhar ga.ī

un kī nigāh-e-lutf ye ehsān kar ga.ī

dāmān-e-dil umiid ke phūloñ se bhar ga.ī

kyā jaane koī kaisī qayāmat uThā.egī

dil se nikal ke aah falak tak agar ga.ī

apnī jagah qarīne se har shai hai bazm meñ

vo kyā ga.e ki raunaq-e-dīvār-o-dar ga.ī

do din meñ un ke phuul se chehre ko kyā huā

do din meñ un kī chāñd sī sūrat utar ga.ī

'zaidī' ba-faiz-e-marg ye sābit huā ki ziist

motī kī ik laḌī thī ki TuuTī bikhar ga.ī

wo ek nazar jo dil se jigar tak utar gai

afsana-e-hayat ki takmil kar gai

kya puchhte ho mujh se jawani kidhar gai

bas itna yaad hai idhar aai udhar gai

un ki nigah-e-lutf ye ehsan kar gai

daman-e-dil umid ke phulon se bhar gai

kya jaane koi kaisi qayamat uThaegi

dil se nikal ke aah falak tak agar gai

apni jagah qarine se har shai hai bazm mein

wo kya gae ki raunaq-e-diwar-o-dar gai

do din mein un ke phul se chehre ko kya hua

do din mein un ki chand si surat utar gai

'zaidi' ba-faiz-e-marg ye sabit hua ki zist

moti ki ek laDi thi ki TuTi bikhar gai