wo ek shajar jo kisi rut mein be-samar na raha

vo ik shajar jo kisī rut meñ be-samar na rahā

ye kis ne kaaT diiñ shāḳheñ ki phir shajar na rahā

kuchh aur sochtā kab āñdhiyoñ ne mohlat dī

mujhe bas itnī ḳhabar thī ki merā ghar na rahā

na jaane kab se yuuñ hī saath saath hai mere

vo ajnabī jo kabhī merā ham-safar na rahā

hatheliyoñ se chhupāyā charāġh-e-dil us ne

yahāñ talak ki havā kā koī asar na rahā

salīqa aa gayā jab ḳhud pe vaar karne kā

to dushmanoñ kā koī ḳhauf koī Dar na rahā

vo rāste se jo palTā to ruk gayā maiñ bhī

qadam qadam na rahe phir safar safar na rahā

nazar se us ne girāyā kuchh is tarah 'ḳhāvar'

ki maiñ ḳhuud apnī nigāhoñ meñ mo'atabar na rahā

wo ek shajar jo kisi rut mein be-samar na raha

ye kis ne kaT din shaKHen ki phir shajar na raha

kuchh aur sochta kab aandhiyon ne mohlat di

mujhe bas itni KHabar thi ki mera ghar na raha

na jaane kab se yun hi sath sath hai mere

wo ajnabi jo kabhi mera ham-safar na raha

hatheliyon se chhupaya charagh-e-dil us ne

yahan talak ki hawa ka koi asar na raha

saliqa aa gaya jab KHud pe war karne ka

to dushmanon ka koi KHauf koi Dar na raha

wo raste se jo palTa to ruk gaya main bhi

qadam qadam na rahe phir safar safar na raha

nazar se us ne giraya kuchh is tarah 'KHawar'

ki main KHud apni nigahon mein mo'atabar na raha