wo jab tha apna thin uski badhaiyan kya kya

vo jab thā apnā thiiñ us kī badhā.iyāñ kyā kyā

nazar meñ rahtī haiñ ab bevafā.iyāñ kyā kyā

ab husn-o-nāz ke andāz thoḌā kam kar deñ

ki hashr Dhātī haiñ kāfir-adā.iyāñ kyā kyā

havā meñ jharnoñ meñ chiḌiyoñ ke chahchahāne meñ

qasam ḳhudā kī haiñ naġhma-sarā.iyāñ kyā kyā

ḳhudā ke vāste lahje ko shabnamī kar do

lagātī aag haiñ sho’la-navā.iyāñ kyā kyā

hamārā 'ahd-e-guzishta thā dil-navāz bahut

huī thiiñ pūchhiye mat āshnā.iyāñ kyā kyā

ishāre guftugū dīdār lams qurb visāl

haiñ chāhatoñ ke maraz kī davā.iyāñ kyā kyā

dhanak gulāb kañval chāñd ġhuncha aur sūraj

haiñ us ke husn kī jalva-numā.iyāñ kyā kyā

hamārā ‘azm-e-musammam thā jo nikal aa.e

na pūchho rāh-e-vafā meñ thiiñ khā.iyāñ kyā kyā

wo jab tha apna thin us ki badhaiyan kya kya

nazar mein rahti hain ab bewafaiyan kya kya

ab husn-o-naz ke andaz thoDa kam kar den

ki hashr Dhati hain kafir-adaiyan kya kya

hawa mein jharnon mein chiDiyon ke chahchahane mein

qasam KHuda ki hain naghma-saraiyan kya kya

KHuda ke waste lahje ko shabnami kar do

lagati aag hain sho’la-nawaiyan kya kya

hamara 'ahd-e-guzishta tha dil-nawaz bahut

hui thin puchhiye mat aashnaiyan kya kya

ishaare guftugu didar lams qurb visal

hain chahaton ke maraz ki dawaiyan kya kya

dhanak gulab kanwal chand ghuncha aur suraj

hain us ke husn ki jalwa-numaiyan kya kya

hamara ‘azm-e-musammam tha jo nikal aae

na puchho rah-e-wafa mein thin khaiyan kya kya