wo jalwa-gah-e-naz mein jis waqt aa gae

vo jalva-gāh-e-nāz meñ jis vaqt aa ga.e

nāz-o-adā se hosh sabhī ke uḌā ga.e

dil meñ vo aa ke hasrat-o-armāñ jagā ga.e

ummīd ke charāġh jalā kar bujhā ga.e

is tarah apnā jalva-e-zebā dikhā ga.e

aa kar nigāh-e-shauq se dil meñ samā ga.e

naḳhl-e-murād phūloñ se merā sajā ga.e

vo aa ga.e to saarī bahāroñ pe chhā ga.e

kab tak yūñhī dikhā.eñge ham ko vo sabz-bāġh

rasm-e-vafā nibhānī thī jin ko nibhā ga.e

ham arz-e-mudda.ā bhī na kuchh un se kar sake

aayā jo dil meñ un ke hameñ vo sunā ga.e

ma.alūm thā na itne talavvun mizāj haiñ

vo ho ga.e unhīñ ke unheñ jo bhī bhā ga.e

soz-e-darūñ ne kar diyā jiinā mirā harām

ik aag aisī dīda-o-dil meñ lagā ga.e

armāñ the jitne jal ke sabhī ḳhaak ho ga.e

dil par vo aisī barq-e-tabassum girā ga.e

tark-e-ta.alluqāt meñ un ko lagī na der

auqāt merī kyā hai mujhe vo batā ga.e

qaa.em ḳhumār us kā hai 'barqī' abhī talak

apnī nigāh-e-nāz se vo jo pilā ga.e

wo jalwa-gah-e-naz mein jis waqt aa gae

naz-o-ada se hosh sabhi ke uDa gae

dil mein wo aa ke hasrat-o-arman jaga gae

ummid ke charagh jala kar bujha gae

is tarah apna jalwa-e-zeba dikha gae

aa kar nigah-e-shauq se dil mein sama gae

naKHl-e-murad phulon se mera saja gae

wo aa gae to sari bahaaron pe chha gae

kab tak yunhi dikhaenge hum ko wo sabz-bagh

rasm-e-wafa nibhani thi jin ko nibha gae

hum arz-e-muddaa bhi na kuchh un se kar sake

aaya jo dil mein un ke hamein wo suna gae

malum tha na itne talawwun mizaj hain

wo ho gae unhin ke unhen jo bhi bha gae

soz-e-darun ne kar diya jina mera haram

ek aag aisi dida-o-dil mein laga gae

arman the jitne jal ke sabhi KHak ho gae

dil par wo aisi barq-e-tabassum gira gae

tark-e-talluqat mein un ko lagi na der

auqat meri kya hai mujhe wo bata gae

qaem KHumar us ka hai 'barqi' abhi talak

apni nigah-e-naz se wo jo pila gae