wo jalwa-gah-e-naz hai ya bazm-e-tur hai

vo jalva-gah-e-nāz hai yā bazm-e-tūr hai

har ek zarra rū-kash-e-duniyā-e-nūr hai

in ḳhud-numā.iyoñ pe bhī mahrūmiyāñ 'ajab

ai chashm-e-nā-murād ye terā qusūr hai

allāh re imbisāt-e-tamāshā-e-husn-e-dost

duniyā asīr-e-mauja-e-bahr-e-surūr hai

māyūs ho na dil kisī ummīd-vār kā

ai husn-e-be-niyāz tarahhum zarūr hai

nairañgī-e-kamāl-e-mohabbat to dekhiye

muusā harīf-e-jalva-e-lailā-e-tūr hai

maiñ aur tāb-e-jalva-e-barq-e-jamāl-e-yār

ai aql-e-harzā-kār sarāsar futūr hai

rangīniyoñ meñ ġharq hai kyoñ bazm-e-kā.enāt

allāh kaun jalva-tarāz-e-zuhūr hai

is dushman-e-vafā se hai ummīd-e-iltifāt

'razmī' ye kyā ḳhayāl hai kuchh bhī shu'ūr hai

wo jalwa-gah-e-naz hai ya bazm-e-tur hai

har ek zarra ru-kash-e-duniya-e-nur hai

in KHud-numaiyon pe bhi mahrumiyan 'ajab

ai chashm-e-na-murad ye tera qusur hai

allah re imbisat-e-tamasha-e-husn-e-dost

duniya asir-e-mauja-e-bahr-e-surur hai

mayus ho na dil kisi ummid-war ka

ai husn-e-be-niyaz tarahhum zarur hai

nairangi-e-kamal-e-mohabbat to dekhiye

musa harif-e-jalwa-e-laila-e-tur hai

main aur tab-e-jalwa-e-barq-e-jamal-e-yar

ai aql-e-harza-kar sarasar futur hai

ranginiyon mein gharq hai kyon bazm-e-kaenat

allah kaun jalwa-taraaz-e-zuhur hai

is dushman-e-wafa se hai ummid-e-iltifat

'razmi' ye kya KHayal hai kuchh bhi shu'ur hai