wo jawan dilon ka hasin milan tujhe yaad ho ki na yaad ho

vo javāñ diloñ kā hasīñ milan tujhe yaad ho ki na yaad ho

mujhe yaad hai mire kam-suḳhan tujhe yaad ho ki na yaad ho

vo chahaktā lahja vo guftugū vo khanak tirī sar-e-āb-jū

vo hasīn shaam kā bāñkpan tujhe yaad ho ki na yaad ho

vo mohabbatoñ kī kahāniyāñ vo rifāqateñ vo javāniyāñ

vo badan meñ jaagī huī agan tujhe yaad ho ki na yaad ho

vo sharārateñ vo latāfateñ vo mohabbateñ vo ināyateñ

vo mahak-fashāñ tirā pairahan tujhe yaad ho ki na yaad ho

mujhe yaad hai mire dilrubā vo zamāna shohrat-e-ishq kā

the raqīb donoñ pe harf-zan tujhe yaad ho ki na yaad ho

mire ham-nafas mire mehrbāñ vo fazā meñ uḌtā huā dhuāñ

vo ThiThurtī rātoñ kā bāñkpan tujhe yaad ho ki na yaad ho

tire husn kā jo faqīr thā tirī zulf kā jo asiir thā

vo 'ḳhatīb' ḳhasta-o-kam-suḳhan tujhe yaad ho ki na yaad ho

wo jawan dilon ka hasin milan tujhe yaad ho ki na yaad ho

mujhe yaad hai mere kam-suKHan tujhe yaad ho ki na yaad ho

wo chahakta lahja wo guftugu wo khanak teri sar-e-ab-ju

wo hasin sham ka bankpan tujhe yaad ho ki na yaad ho

wo mohabbaton ki kahaniyan wo rifaqaten wo jawaniyan

wo badan mein jagi hui agan tujhe yaad ho ki na yaad ho

wo shararaten wo latafaten wo mohabbaten wo inayaten

wo mahak-fashan tera pairahan tujhe yaad ho ki na yaad ho

mujhe yaad hai mere dilruba wo zamana shohrat-e-ishq ka

the raqib donon pe harf-zan tujhe yaad ho ki na yaad ho

mere ham-nafas mere mehrban wo faza mein uDta hua dhuan

wo ThiThurti raaton ka bankpan tujhe yaad ho ki na yaad ho

tere husn ka jo faqir tha teri zulf ka jo asir tha

wo 'KHatib' KHasta-o-kam-suKHan tujhe yaad ho ki na yaad ho