wo jin ki lai hum bhul gae wo miThe git purane hain

vo jin kī lai ham bhuul ga.e vo mīThe giit purāne haiñ

jo sachche rishte-nāte the vo aaj sabhī begāne haiñ

kal jin se nigāheñ miltī thiiñ ik huuk sī dil meñ uThtī thī

ab saare raste band hue vo log sabhī anjāne haiñ

maiñ pyaar kī baat karūñ kis se har baat ḳhayāl-o-ḳhvāb huī

kyā apnī vafā kā zikr karūñ kahte haiñ ye sab afsāne haiñ

maḳhlūq ko zinda rahne do ye dhartī sab kī dhartī hai

ham sab ko ziist kī rāhoñ meñ mil-jul kar bojh uThāne haiñ

tum jis ko sharāb samajhte ho insāñ kā lahū hai sāġhar meñ

ushshāq kā maqtal hai pyāre tum kahte ho maiḳhāne haiñ

wo jin ki lai hum bhul gae wo miThe git purane hain

jo sachche rishte-nate the wo aaj sabhi begane hain

kal jin se nigahen milti thin ek huk si dil mein uThti thi

ab sare raste band hue wo log sabhi anjaane hain

main pyar ki baat karun kis se har baat KHayal-o-KHwab hui

kya apni wafa ka zikr karun kahte hain ye sab afsane hain

maKHluq ko zinda rahne do ye dharti sab ki dharti hai

hum sab ko zist ki rahon mein mil-jul kar bojh uThane hain

tum jis ko sharab samajhte ho insan ka lahu hai saghar mein

ushshaq ka maqtal hai pyare tum kahte ho maiKHane hain