wo jis ke liye maut ka farman hua hai

vo jis ke liye maut kā farmān huā hai

us kī ye ḳhatā hai ki vo sach bol rahā hai

qad par nahīñ mauqūf yahāñ dil kī baḌā.ī

chhoTā to vo lagtā hai magar dil kā baḌā hai

sāñsoñ meñ basī ek tirī chaah kī ḳhushbū

terā hī tasavvur mirī rag rag meñ rachā hai

lālach bhī burī chiiz hasad bhī hai burī shai

maiñ ne to yahī apne buzurgoñ se sunā hai

sāthī tire tūfān se laḌne bhī lage haiñ

aur tū hai ki sāhil pe khaḌā soch rahā hai

baisākhiyāñ rakhte haiñ sabhī tere nagar meñ

'sājid' hī akelā hai jo pairoñ pe khaḌā hai

wo jis ke liye maut ka farman hua hai

us ki ye KHata hai ki wo sach bol raha hai

qad par nahin mauquf yahan dil ki baDai

chhoTa to wo lagta hai magar dil ka baDa hai

sanson mein basi ek teri chah ki KHushbu

tera hi tasawwur meri rag rag mein racha hai

lalach bhi buri chiz hasad bhi hai buri shai

main ne to yahi apne buzurgon se suna hai

sathi tere tufan se laDne bhi lage hain

aur tu hai ki sahil pe khaDa soch raha hai

baisakhiyan rakhte hain sabhi tere nagar mein

'sajid' hi akela hai jo pairon pe khaDa hai