wo jo dard tha tere ishq ka wahi harf harf-e-suKHan mein hai

vo jo dard thā tire ishq kā vahī harf harf-e-suḳhan meñ hai

vahī qatra qatra lahū banā vahī reza reza badan meñ hai

vo nasīm jaane kahāñ ga.ī vo gulāb jaane kidhar khile

koī aag pichhlī bahār kī mire qalb meñ na chaman meñ hai

yahī vaqt sail-e-ravāñ liye mirī kashtiyoñ ko Dubo gayā

koī lahar āb-e-hayāt kī abhī gañg meñ na jaman meñ hai

dam-e-sub.h aaj hai dopahar na vo chahchahe na vo zamzame

vo parinde uḌ ke kahāñ ga.e koī shor gaañv na ban meñ hai

jo sitārā qibla-e-rāh thā vo sharār ban ke bujhā 'na.īm'

ye zamīn chādar-e-ḳhāk hai mirā chāñd jab se gahan meñ hai

wo jo dard tha tere ishq ka wahi harf harf-e-suKHan mein hai

wahi qatra qatra lahu bana wahi reza reza badan mein hai

wo nasim jaane kahan gai wo gulab jaane kidhar khile

koi aag pichhli bahaar ki mere qalb mein na chaman mein hai

yahi waqt sail-e-rawan liye meri kashtiyon ko Dubo gaya

koi lahar aab-e-hayat ki abhi gang mein na jaman mein hai

dam-e-subh aaj hai dopahar na wo chahchahe na wo zamzame

wo parinde uD ke kahan gae koi shor ganw na ban mein hai

jo sitara qibla-e-rah tha wo sharar ban ke bujha 'naim'

ye zamin chadar-e-KHak hai mera chand jab se gahan mein hai