wo jo KHud apne badan ko saeban karta nahin

vo jo ḳhud apne badan ko sā.ebāñ kartā nahīñ

kyuuñ na pachhtā.e ki saaya āsmāñ kartā nahīñ

jaane kyuuñ ik dūsre ke log haiñ shikva-guzār

kaun kis ke hausloñ kā imtihāñ kartā nahīñ

kuchh nahīñ khultā ki āḳhir kyā kahānī hai jise

log sunñā chāhte haiñ maiñ bayāñ kartā nahīñ

us se milte vaqt tujh ko saath rakhkhūñ kis tarah

maiñ to apne-āp ko bhī darmiyāñ kartā nahīñ

merī peshānī pe apnī mohr kar detī haiñ sabt

nasb jin rāhoñ pe meñ apnā nishāñ kartā nahīñ

mujh meñ aur ham-peshgāñ meñ bas yahī ik farq hai

maañg hai jis maal kī zeb-e-dukāñ kartā nahīñ

sarf patvāroñ ke bal par paar kyā utregā vo

in havāoñ meñ jo ūñchā bādbāñ kartā nahīñ

hech hai sab kī nazar meñ dekhnā 'rāshid' vo shaḳhs

apne baare meñ jo ḳhud koī gumāñ kartā nahīñ

wo jo KHud apne badan ko saeban karta nahin

kyun na pachhtae ki saya aasman karta nahin

jaane kyun ek dusre ke log hain shikwa-guzar

kaun kis ke hauslon ka imtihan karta nahin

kuchh nahin khulta ki aaKHir kya kahani hai jise

log sunna chahte hain main bayan karta nahin

us se milte waqt tujh ko sath rakhkhun kis tarah

main to apne-ap ko bhi darmiyan karta nahin

meri peshani pe apni mohr kar deti hain sabt

nasb jin rahon pe mein apna nishan karta nahin

mujh mein aur ham-peshgan mein bas yahi ek farq hai

mang hai jis mal ki zeb-e-dukan karta nahin

sarf patwaron ke bal par par kya utrega wo

in hawaon mein jo uncha baadban karta nahin

hech hai sab ki nazar mein dekhna 'rashid' wo shaKHs

apne bare mein jo KHud koi guman karta nahin