wo jo mausam-e-garma ki pahli barish ka chhinTa tha

vo jo mausam-e-garmā kī pahlī bārish kā chhīñTā thā

tap vaale āñgan meñ soñdhī ḳhushbū ban kar bikhrā thā

us kī bābat pahroñ sochte rahnā achchhā lagtā thā

baat koī bhī yaad nahīñ haañ lahja dhaḌkan jaisā thā

ham ne kab jhūle Daale the ham ne kab peñgeñ lī thiiñ

peḌ kī sab shāḳhoñ pe zamāne kī āñkhoñ kā pahrā thā

ham mohtāt bahut the phir kyoñ aise dar par dastak dī

jis ke gharāne kī har pagḌī kā har shamla ūñchā thā

nazr kiyā har shāhjahāñ ne har mumtāz ko taaj mahal

dil kā rāj-siñghāsan denā dil vāloñ kā ḳhāsā thā

haath meñ us kā haath nahīñ zanjīr hai guzre lamhoñ kī

bijlī chamkī barkhā barsī kul qissa do pal kā thā

ishq kiyā yā riit nibhā.ī kaise batā.eñ kyā biitī

āñkhoñ meñ ik sail-e-balā aur dil meñ taptā sahrā thā

bābul kā āñgan sājan kā dvaar parā.e the donoñ

kaun sī chaukhaT aurat kī thī kaun sā ambar us kā thā

koī agar pūchhe kah denā 'tal.at' ye bhī bhuul ga.e

jis kāran ham ḳhud ko bhūle vo manmohan kaisā thā

wo jo mausam-e-garma ki pahli barish ka chhinTa tha

tap wale aangan mein sondhi KHushbu ban kar bikhra tha

us ki babat pahron sochte rahna achchha lagta tha

baat koi bhi yaad nahin han lahja dhaDkan jaisa tha

hum ne kab jhule Dale the hum ne kab pengen li thin

peD ki sab shaKHon pe zamane ki aankhon ka pahra tha

hum mohtat bahut the phir kyon aise dar par dastak di

jis ke gharane ki har pagDi ka har shamla uncha tha

nazr kiya har shahjahan ne har mumtaz ko taj mahal

dil ka raj-singhasan dena dil walon ka KHasa tha

hath mein us ka hath nahin zanjir hai guzre lamhon ki

bijli chamki barkha barsi kul qissa do pal ka tha

ishq kiya ya rit nibhai kaise bataen kya biti

aankhon mein ek sail-e-bala aur dil mein tapta sahra tha

babul ka aangan sajan ka dwar parae the donon

kaun si chaukhaT aurat ki thi kaun sa ambar us ka tha

koi agar puchhe kah dena 'talat' ye bhi bhul gae

jis karan hum KHud ko bhule wo manmohan kaisa tha