wo jo raaton ki tanhaiyon mein likhe chahaton ke sahife sabhi phaT gae

vo jo rātoñ kī tanhā.iyoñ meñ likhe chāhatoñ ke sahīfe sabhī phaT ga.e

ham pe hañste rahe vo sabhī rāste ham jahāñ bhī tirī sun ke aahaT ga.e

ranjisheñ har taraf hī panapne lagīñ pyaar ke rāste band hone lage

shahr meñ nafratoñ kī havā jab chalī buġhz kī gard se zehn-o-dil aT ga.e

dekhte dekhte jānte būjhte ye judā.ī hamārā muqaddar huī

pahle socheñ baTīñ phir safar baT gayā zād-e-rah jab baTā rāste baT ga.e

dostoñ kī vafāoñ pe nāzān the itnā puujā ki un ko ḳhudā kar diyā

ḳhud ko adnā kiyā un ko a.alā kiyā sar jhukā.e ga.e aur sar kaT ga.e

maiñ ne sochā hai aksar hī is baat par kaisā aaseb chhāyā hai har zaat par

din jo niklā to saa.e the qad se baḌe shaam hote hī jismoñ se kyoñ ghaT ga.e

tiir pahuñche na dushman ke ḳhemoñ talak apne yāroñ kī dekhī zarā sī jhalak

yaar apnā muqaddar to honā hī thā jab hamāre muqābil hī vo DaT ga.e

aap kā saath hī ham ko matlūb thā aap kī raah kā sang hargiz na thā

aap ne jab kahā saath hī chal diye aap ne jab kahā raah se haT ga.e

is baras pyaar meñ phir ḳhasāra huā ham ne sochā thā anmol ho jā.egā

is jahāñ meñ har ik shai kī qīmat baḌhī is baras pyaar ke daam phir ghaT ga.e

biij bo.e ga.e ḳhuuñ pilā.e ga.e un kī chhāñv meñ jīvan bitā.e ga.e

mere gaañv meñ basne lagī bhuuk to peḌ jitne purāne the sab kaT ga.e

kis ne likhī ye qismat kī tahrīr thī yā ki un kī ye apnī hī taqsīr thī

jin kī ūñchī falak se bhī parvāz thī un parindoñ ke aksar hī par kaT ga.e

wo jo raaton ki tanhaiyon mein likhe chahaton ke sahife sabhi phaT gae

hum pe hanste rahe wo sabhi raste hum jahan bhi teri sun ke aahaT gae

ranjishen har taraf hi panapne lagin pyar ke raste band hone lage

shahr mein nafraton ki hawa jab chali bughz ki gard se zehn-o-dil aT gae

dekhte dekhte jaante bujhte ye judai hamara muqaddar hui

pahle sochen baTin phir safar baT gaya zad-e-rah jab baTa raste baT gae

doston ki wafaon pe nazan the itna puja ki un ko KHuda kar diya

KHud ko adna kiya un ko aala kiya sar jhukae gae aur sar kaT gae

main ne socha hai aksar hi is baat par kaisa aaseb chhaya hai har zat par

din jo nikla to sae the qad se baDe sham hote hi jismon se kyon ghaT gae

tir pahunche na dushman ke KHemon talak apne yaron ki dekhi zara si jhalak

yar apna muqaddar to hona hi tha jab hamare muqabil hi wo DaT gae

aap ka sath hi hum ko matlub tha aap ki rah ka sang hargiz na tha

aap ne jab kaha sath hi chal diye aap ne jab kaha rah se haT gae

is baras pyar mein phir KHasara hua hum ne socha tha anmol ho jaega

is jahan mein har ek shai ki qimat baDhi is baras pyar ke dam phir ghaT gae

bij boe gae KHun pilae gae un ki chhanw mein jiwan bitae gae

mere ganw mein basne lagi bhuk to peD jitne purane the sab kaT gae

kis ne likhi ye qismat ki tahrir thi ya ki un ki ye apni hi taqsir thi

jin ki unchi falak se bhi parwaz thi un parindon ke aksar hi par kaT gae