wo juda mujhse ho gae mil ke

vo judā mujh se ho ga.e mil ke

rah ga.e dil meñ hausle dil ke

chal ke naqsh-e-qadam pe kāmil ke

ham qarīb aa ga.e haiñ manzil ke

parda-poshī hayā lab-e-ḳhāmosh

haiñ ye ādāb un kī mahfil ke

un ke ġham meñ guzar hī jā.eñge

chand lamhe haiñ aur mushkil ke

bebasī be-kasī vafā-koshī

haiñ ye sāmān-e-musībat dil ke

bad-nasībī kī kashtī-e-ummīd

aa ke Duubī hai paas sāhil ke

ḳhuub kārīgarī junūñ ne kī

chaak dāman hue haiñ sil sil ke

jām-e-jam se bhī kuchh nahīñ bantā

jab bigaḌte haiñ taur mahfil ke

tauq-e-vahshat paḌā jo gardan meñ

silsile mil ga.e salāsil ke

jin ko tūfān bhī Dubo na sakā

kaam aa.e vo mauj-e-sāhil ke

ashk-e-ġham se bhī shām-e-ġham maiñ ne

daaġh dho.e haiñ dāman-e-dil ke

jin pe ehsāñ haiñ apne ai 'ḳhushtar'

vo daġhā kar rahe haiñ mil mil ke

wo juda mujh se ho gae mil ke

rah gae dil mein hausle dil ke

chal ke naqsh-e-qadam pe kaamil ke

hum qarib aa gae hain manzil ke

parda-poshi haya lab-e-KHamosh

hain ye aadab un ki mahfil ke

un ke gham mein guzar hi jaenge

chand lamhe hain aur mushkil ke

bebasi be-kasi wafa-koshi

hain ye saman-e-musibat dil ke

bad-nasibi ki kashti-e-ummid

aa ke Dubi hai pas sahil ke

KHub karigari junun ne ki

chaak daman hue hain sil sil ke

jam-e-jam se bhi kuchh nahin banta

jab bigaDte hain taur mahfil ke

tauq-e-wahshat paDa jo gardan mein

silsile mil gae salasil ke

jin ko tufan bhi Dubo na saka

kaam aae wo mauj-e-sahil ke

ashk-e-gham se bhi sham-e-gham main ne

dagh dhoe hain daman-e-dil ke

jin pe ehsan hain apne ai 'KHushtar'

wo dagha kar rahe hain mil mil ke